ინსტიტუტი "ტექინფორმი"

საქართველოს ტექნიკური უნივერსიტეტის ინსტიტუტი ტექინფორმი დაარსდა საქართველოს სსრ მინისტრთა საბჭოს 1958 წლის 10 დეკემბერს №801 დადგენილებით – როგორც სამეცნიერო-ტექნიკური ინფორმაციის ინსტიტუტი.

საქართველოს სსრ მინისტრთა საბჭოს 1959 წლის 30 მარტის №224 დადგენილებით იგი გაერთიანდა სამეცნიერო-ტექნიკური ინფორმაციისა და პროპაგანდის რესპუბლიკურ სახლთან და დაერქვა სამეცნიერო-ტექნიკური ინფორმაციისა და პროპაგანდის ინსტიტუტი.

საქართველოს სსრ მინისტრთა საბჭოს 1969 წლის 4 მარტის №111 დადგენილებით ინსტიტუტი გარდაიქმნა საქართველოს სამეცნიერო-ტექნიკური ინფორმაციისა და ტექნიკურ-ეკონომიკურ გამოკვლევათა სამეცნიერო-საკვლევ ინსტიტუტად, ხოლო 1992 წლის 25 მარტის მეცნიერებისა და ტექნიკის სამინისტროს გადაწყვეტილებით ეწოდა საქართველოს სამეცნიერო-ტექნიკური ინფორმაციისა და ტექნიკურ-ეკონომიკურ გამოკვლევათა სამეცნიერო-კვლევითი ინსტიტუტი – ტექინფორმი.

საქართველოს რესპუბლიკის პრემიერ-მინისტრის 1993 წლის 26 ნოემბრის №898გ განკარგულებით ტექინფორმს დაევალა საქართველოს რესპუბლიკის წარმომადგენლობა სამეცნიერო-ტექნიკური ინფორმაციის საერთაშორისო ორგანიზაციებში.

საქართველოს მთავრობის 2006 წლის 16 მარტის №58 დადგენილების საფუძველზე ინსტიტუტი ტექინფორმი დაფუძნდა საჯარო სამართლის იურიდიულ პირად – სახელწოდებით სსიპ ინსტიტუტი ტექინფორმი.

საქართველოს მთავრობის 2010 წლის 20 აგვისტოს №246 დადგენილების საფუძველზე ტექინფორმი რეორგანიზებულ იქნა საქართველოს ტექნიკური უნივერსიტეტის სტრუქტურულ ერთეულად – დამოუკიდებელი სამეცნიერო-კვლევითი ინსტიტუტის სახით.

ტექინფორმის მისია

ტექინფორმის მისიაა ქვეყნის სამეცნიერო და საინოვაციო R&D სისტემის მართვისა და განვითარების ინფორმაციული უზრუნველყოფა, სისტემის არსებული მდგომარეობის შესწავლა და მონიტორის ფუნქციების განხორციელება. ამ მისიის შესრულებას საფუძვლად უდევს OECD-ის (The Organization for Economic Co-operation and Development) დოქტრინა, რომელშიც აღნიშნულია R&D სისტემის მნიშვნელობა ნებისმიერი ქვეყნის ეკონომიკური განვითარებისა და R&D სფეროს ეფექტური მენეჯმენტის საქმეში სათანადო საინფორმაციო უზრუნველყოფის, მართვის და ანალიტიკური მიმართულებებით წარმოებული კვლევების საფუძველზე.

OECD-ის დოქტრინის გათვალისწინებით ჩამოყალიბებულია პრიორიტეტულ მიმართულებათა ჩამონათვალი, რომელთა შესრულება ტექინფორმს საშუალებას აძლევს აღასრულოს თავისი მისია.

ტექინფორმის მიზნები და ამოცანები

• სამეცნიერო-კვლევითი, საკონსულტაციო და საექსპერტო საქმიანობის განხორციელება სამეცნიერო და საინოვაციო სფეროებში მიმდინარე ინფორმაციულ პროცესებში და საინფორმაციო ტექნოლოგიების განვითარების საკითხებში;
• საზოგადოების, სახელმწიფო და კომერციული ორგანიზაციების უზრუნველყოფა სამეცნიერო-ტექნიკური, ტექნოლოგიური, ეკონომიკური, სამართლებრივი და სხვა ინფორმაციით;
• ქვეყნის ეკონომიკური ზრდისა და განვითარების, აგრეთვე მართვის ინფორმაციული უზრუნველყოფის მიზნით ინტეგრირებული საინფორმაციო-ანალიტიკური სისტემის ფორმირება და გაძღოლა;
• ქვეყნის სამეცნიერო-ინოვაციური სისტემის ეფექტურობის შეფასება, აგრეთვე სხვა ქვეყნებთან მიმართებაში საქართველოს სამეცნიერო-ინოვაციური სისტემის შედარებითი ანალიზი მეცნიერებათმზომელობის, სტატისტიკურ-ეკონომიკური და მათემატიკური მოდელირების მეთოდების საფუძველზე;
• სახელმწიფო სამეცნიერო-კვლევითი სამუშაოებისა და ქვეყანაში დაცული დისერტაციების სახელმწიფო რეგისტრაცია, გამოუქვეყნებელი სამეცნიერო-კვლევითი სამუშაოების დეპონირება;
• ქვეყანაში და მის ფარგლებს გარეთ სემინარების, კონფერენციების, პრეზენტაციების, გამოფენებისა და სხვა ღონისძიებების ჩატარება;
• ახალი საინფორმაციო ტექნოლოგიების შექმნა და დანერგვა;
• საქართველოს ორგანიზაციების მსოფლიო საინფორმაციო რესურსებთან დაკავშირების მიზნით მონაცემთა გადაცემის სისტემების განვითარება და ექსპლოატაცია;
• საერთაშორისო სამეცნიერო თანამშრომლობის განვითარება, ქვეყნის წარმომადგენლის როლის შესრულება სამეცნიერო-ტექნიკური ინფორმაციის სფეროს საერთაშორისო ორგანიზაციებში და ცენტრებში;
• საქართველოს მეცნიერთათვის, მეწარმეებისთვის, იურიდიული და ფიზიკური პირებისთვის დახმარების გაწევა ახალი ტექნოლოგიებისა და საინვესტიციო წინადადებების მომზადებასა და გავრცელებაში;
• უნივერსიტეტის სასწავლო პროცესში მონაწილეობა.